D’Beeforter Kulturkommissioun huet an Zesummenaarbecht mat der Gemeng op ee Concert mam Kanner- a Jugendchouer Muselfénkelcher vu Gréiwemaacher an der Beeforter Kierch invitéiert. Deen am Joer 1976 gegrënnte Chouer ass an der Tëschenzäit zu enger fester Gréisst an der Regioun gewues an ass och iwwert d’Grenzen eraus bekannt. Schonns um Grënnungsdag de 7. Oktober 1976 hu sech 36 Kanner ugemellt an hunn de Grondsteen vum Miseler Aushängeschëld geluecht.
Am Kannerchouer sange Meedercher a Jongen am Alter tësche sechs an eelef Joer an zanter 2017 sti si ënnert der Leedung vum Marianne Hengel. Am Jugendchouer kann ee vun zwielef Joer un a bis sou laang ee wëll matsangen. Aktuell sinn d’Sängerinnen a Sänger am Alter tëschen zwielef an 20 Joer vertrueden. Hir Dirigentin ass d’Nathalie Laurent.
Déi zwou Dirigentinnen hunn och beim Concert zu Beefort d’Leedung gehat a gesong gouf de folgende Programm: “Ouverture” (Michel Fugain), “Friedensbrücken der Welt”, “He’s got the Whole World”, “Christmas in the Old man’s hat”, “Hymne à la nuit”, “Singen wir im Schein der Kerzen”, “Gatatumba”, “Halleluia”, “Frëndschaftslidd”, “On écrit sur les murs”, “Denis Ascani” (Piano), “I have a dream”, “Journey of the angels”, “Chrëschtgedanken”, “As long as I have music” an “This little light of mine”.
Zum Ofschloss huet d’Presidentin vun Kulturkommissioun Monique Link am Numm vun der Kulturkommissioun an der Gemeng de “Muselfénkelcher” ee klenge Cadeau fir de flotte Concert iwwerreecht.
