Gëschter gouf zu Déiljen den Nationale Gedenkdag an der Gemeng Beefort zesumme mat der Déiljer Kiermes zelebréiert. Den Datum vun der Kiermes zu Déiljen riicht sech nom Patréiner vun der Kierch, dem hellege Lucas. Säin Datum ass den 18. Oktober an dëst Joer ass deen Datum genau op den Dag vum Patréiner gefall.
Ugefaangen huet den Dag mat enger Gedenkmass, déi vun der Pastoralassistentin Josiane Mirkes gestallt a vun der Chorale Ste Cécile Beefort, Haler, Waldbëlleg musikalesch encadréiert gouf. Am Mëttelpunkt vun der emotionaler Priedegt stoung d’Thema “Gemeinschaft” mat all deene verschiddene Facetten. An der deemoleger Zäit an awer haut an dat besonnesch wann eng Persoun feelt. Da muss jidderee fir den aneren do sinn, och wann et schwéier fält. Dës Erausfuerderung huet an dësen Deeg nom Ofliewe vum Paschtouer Carlo Morbach, deen an de leschte 25 Joer Paschtouer zu Beefort war, eng besonnesch Bedeitung kritt. Op jidde Fall huet d’Josiane Mirkes déi passend Wieder an hirer Priedegt fonnt, déi zum Schluss mat engem Applaus gewierdegt gouf.
No der Mass ass de Buergermeeschter Jean-Luc Nosbusch a senger Ried op déi wärend dem Zweete Weltkrich gefale Jonge vun Déiljen agaangen: Théo Gansen, René Ludovicy, Jean Ludovicy a Jean-Paul Schaaf. Hei stécht besonnesch de Jean-Paul Schaaf ervir, deen am Alter vun nëmme 14 Joer den 18. September 1944 beim Hidde vun de Kéi vun der däitscher Säit mat fënnef Schëss erschoss gouf. Op der Gedenktafel ass eng Knosp, een Zeeche vum Liewen, agemeesselt. Zum Ofschloss huet de Schäfferot Blumme virun der Gedenktafel néiergeluecht.
