Gëschter war Kiermes zu Beefort an deen Datum riicht sech nom Méchelsdag (Saint Michel), deen op den 29. September fält. An der Reegel ass d’Kiermes den éischte Sonndeg nom Méchelsdag a well de Méchelsdag dëst Joer op engem Sonndeg läit, gouf also op de genauen Dag Kiermes gefeiert.
Laang Zäit gouf et keng richteg Kiermes zu Beefort an et war 2018, wéi déi deemoleg Integratiounskommissioun freidesowes eng symbolesch Ouverture mat engem Hämmelsmarsch organiséiert huet. Sonndes war e klenge Kiermesmaart mat Musek, Iessen, Gedrénks a Ponyreiden, dee vum Syndicat d’initiative zesumme mat den Duerfveräiner organiséiert gouf. Des Weidere konnten een um Kannerfloumaart vun der Elterevereenegung haaptsächlech Spillsaache kafen. Mat der Zäit ass de Programm vum Sonndeg ewechgefall esou, datt nëmmen eng symbolesch Ouverture mat Danzmusek iwwreg bliwwen ass.
Dëst Joer huet d’Gemeng an Zesummenaarbecht mat de Veräiner Amicale Beeforter Pompjeeën, Beeforter Duerffrënn, Beaufort Knights, Club Hippique, Judo-Club an Theaterfrënn Beefort eng richteg Kiermes mat Buden a Karussell organiséiert. De Programm huet moies mat enger Kiermesmass ugefaangen, déi vun de Choralle Sainte Cécile vu Beefort a “Sang mat” Waldbëlleg/Haler encadréiert gouf. An der Kiermesmass huet de Paschtouer Carlo Morbach den Ursprong erkläert an drop higewisen, datt de Patréiner vun der Beeforter Kierch de Saint Michel ass.
No der Mass goung et am Cortège op d’Place des Nations. Zwee Hämmel hunn de Hämmelsmarsch ugefouert a fir déi richteg Musek huet d’Harmonie vu Bäerdref gesuergt. Bei der Arrivée beim Kiosk huet de Buergermeeschter Jean-Luc Nosbusch d’Bändchen duerchgeschnidden an a senger kuerzer Ried ass hien uschléissend op d’Symbolik vum Hämmelsmarsch agaangen. Mat Kiermeskuch, Kiermesham, Kiermespatt a Kiermesdrëpp gouf d’Kiermes offiziell opgemeet.
Net nëmmen d’Kanner hu sech op de verschidde Spiller ameséiert. Sou zum Beispill huet de Schäfferot beim Rodeo-Reide versicht sou laang wéi méiglech standhaft ze bleiwen a Membere vum Gemengerot hu gemeinsam Inte gefëscht. De Clown Alfonso huet d’Visiteuren zum Laache bruecht a fir déi musikalesch Ënnerhalung huet den “DJ Backy” gesuergt. Dat gutt Wieder a Sonn hunn hiren Deel zum Erfolleg vun dëser neier Form vun der Beeforter Kiermes bäigedroen.
