D’Membere vum “Cercle des Anciens de la Garde Grand-Ducale” hu sech de leschte Samschdeg un den Ufank vun der Ardennenoffensiv de 16. Dezember 1944 erënnert. Reegelméisseg komme si zanter Joren ëm de 16. Dezember op Beefort an halen hei hir Gedenkfeier of. Den nërdlechen Deel vu Lëtzebuerg gouf vun dëser Offensiv besonnesch schwéier getraff an och Beefort gouf an deene Woch méi zerstéiert ewéi déi Jore virdrun.
Ugefaangen huet d’Gedenkfeier nieft der Kierch wou no der Ried vum Buergermeeschter Jean-Luc Nosbusch Blumme bei der Tafel vun de G.I. a virum Monuments aux Morts néiergeluecht goufen. D’Gedenkfeier an der Kierch gouf vum Aumônier Nicolas Wenner zelebréiert a vun de Chorale Sainte Cécile Beefort souwéi “Sang mat Waldbëlleg-Haler” encadréiert.
Uschléissend goufe weider Blumme beim Kummelsbau an och um Schéidbierg néiergeluecht. Bei dëse Momenter huet den Trompettist Edmond Faber fir de musikalesche Kader gesuergt. Ofgeschloss gouf d’Gedenkfeier am Kummelsbau, wou d’Gemeng den Éierewäin offréiert huet an duerno gouf d’Mëttegiessen zerwéiert.
