De leschte Samschdeg huet sech d’Beeforter Schlass bei der éischter Editioun vu “Stones in Vibration” an eng aussergewéinlech Kuliss fir Musek, Kultur a flott Begéinunge verwandelt. Op der Bün stoungen “Nikki Ninja & d’Wibbeldidubs”, “Don Piano”, “Francis of Delirium”, Eva Marija feat. Daniel Žižka, Irem, Samwell an d’Djen Nosi a Joel Marques. Fir weider Ënnerhalung hunn de Jonn Happi an de Stelzentheater “Circolo” gesuergt.
Wärend d’Beeforter Veräiner an d’Mëllerdaller Produzenten dofir gesuergt hunn, datt keen duuschtereg an hongereg bliwwen ass, konnten d’Visiteuren um “Creators Market” déi villfälteg Kreatiounen an de verschiddene Forme vu lokale Kënschtler bewonneren an och kafen.
Et war een Dag, wou Geschicht, Musek a Mënschen aus dem ganze Land zu Beefort zesummekomm sinn a flott Stonne verbruecht hunn. Besonnesch no Abroch vun der Däischtert huet déi faarweg Buerg den eemolege Site an eng aussergewéinlech Ambiance agedaucht.
