De Site nieft der Äispist ass an de leschten Deeg ëm eng Attraktioun méi räich ginn. Pénktlech fir den Ufank vun der Summervakanz goufen hei zwee Outdoor-Dëschtennisdëscher installéiert. An dësem Beräich stinn de Bierger vun der Gemeng Beefort an hire Gäscht follgend Infrastrukturen zur Verfügung: een Terrain Multisports, Outdoor-Fitness fir Senioren, Outdoor-Fitness fir jiddereen a lo nach Outdoor-Dëschtennis. Den nächste Projet op dësem Site steet schonns an de Startlächer: zwou Piste fir Pétanque. D’Aarbechte fänken nom Congé collectif un.
D’Investitioune belafe sech op ronn 12.300 Euro fir den Outdoor-Dëschtennis a knapps 10.000 Euro fir déi zwou Pétanque-Pisten. Pétanque-Frënn musse sech also nach ee bësse gedëllege fir hei ze spillen a bis dohinner kënne se virun der Jugendherberge hirem Hobby nogoen. Dëst ass héchstwahrscheinlech eng Plaz, vun där bestëmmt net vill Leit wëssen.
