Haut am Nomëtteg koum de Kulturminister Eric Thill op Beefort fir sech iwwert den Natur-a Geopark Mëllerdall (NGPM) ze informéieren. Begleet gouf hie vun den Damme Simone Beck a Catherine Decker, déi ënner anerem als Presidentin a Sekretärin an der “Commission nationale pour la Coopération avec l’Unesco” täteg sinn. Bekanntlech gehéiert den Natur- a Geopark Mëllerdall zum weltwäite Reseau vun den “Unesco Global Geoparks”.
No enger kuerzer Begréissung duerch de Buergermeeschter a Member vum Büro vum NGPM Jean-Luc Nosbusch huet den Direkter vum NGPM, Claude Petit, dem Kulturminister Eric Thill déi verschidden Aufgabegebitter vum Natur- a Geopark virgestallt. Uschléissend stoung de Chantier vum neie Centre d’Accueil um Programm, dee vum Marc Rodesch vum Service technique vun der Gemeng Beefort erkläert gouf. Beim Rondgang hunn den éischte Schäffe Bruno Grilo, de Patrick Hierthes vum Büro vum NGPM an d’Birgit Kausch vum NGPM de Gäscht nach zousätzlech Informatioune ginn.
Ofgeschloss gouf d’Visitte vum Kulturminister Eric Thill an der Ausstellung vum Natur- a Geopark Mëllerdall, déi all Dag vun 10 bis 17 Auer an der fréierer Jugendherberge op Nummer 6, rue de l’Auberge hei zu Beefort op ass.
