Den 29. November 2022 gouf den éischte Spuedestéch vun engem Projet vun abordabele Wunnenge vum Fonds du Logement zu Déiljen gemaach an no gutt dräi Joer war gëschter Donneschdeg, de 4. Dezember, déi offiziell Aweiung. De komplette Site mam fréiere Bauerenhaff gouf an eng modern Wunnresidenz ëmgewandelt a gläichzäiteg gouf eng weider Residenz gebaut. D’Investitioun an dëse Projet beleeft sech no aktuelle Berechnungen op ronn 7,5 Milliounen Euro a bei der Aweiung war och de Minister fir Wunnengsbau a Landesplanung, Claude Meisch, präsent.
Fir de Buergermeeschter Jean-Luc Nosbusch ass dëst Gebai méi wéi just Bëton, Stol an Zillen. Et ass e wichtege Schrëtt an d’Zukunft vun eiser Gemeng Beefort an e staarkt Zeeche fir eng inklusiv an nohalteg Wunnengspolitik zu Lëtzebuerg. An enger Zäit, an där Wunnen ëmmer méi eng Erausfuerderung gëtt, spillt de Fonds du Logement eng zentral Roll. Mat dësem Projet ginn net nëmmen nei Wunnenge geschaf, mee et gëtt och e konkrete Beitrag geleescht, fir Familljen, Eenzelpersounen a Jonker en zougänglecht Doheem ze bidden.
D’Präsenz vum Minister Claude Meisch géif ënnersträiche wéi wichteg eng equilibréiert Regionalentwécklung fir d’Land ass an, datt och Gemenge wéi Beefort eng fest a wichteg Plaz an dëser Gesamtstrategie hunn.
Dëse Projet wier och en Deel vun der lokaler Visioun: Beefort soll eng Gemeng bleiwen, an där sech jidderee wuel fillt, wou d’Bevëlkerung eng gesond Mëschung aus Generatiounen a soziale Milieuen ass. Wunne wier d’Basis vun Integratioun, Liewensqualitéit a Gemeinschaft a genee dofir wier et esou essenziell, datt een als Gemeng zesummeschafft fir attraktiv an nohalteg Wunnméiglechkeeten ze schafen.
Zum Ofschloss wollt de Jean-Luc Nosbusch nach eng Kéier ënnersträichen, datt d’Aweiung net nëmmen eng Ouverture vu Wunnengen ass. Et wier eng och eng Ouverture vu Perspektive souwuel fir d’Gemeng, fir d’Regioun a fir déi, déi hei wäerte liewen.
Virun der offizieller Aweiung huet den Direkter vum Fonds de Logement Jacques Vandivinit de sougenannte Bam-Challenge ugeholl an een Äppelbam virum renovéierte Gebai geplanzt. De Video op youtube: https://www.youtube.com/watch?v=7C7NFoF-_Y0
Den offizielle Communiqué vum Fonds du Logement :
Le Fonds du Logement a eu le plaisir de procéder à l’inauguration d’une ancienne ferme réhabilitée et d’une nouvelle résidence, route de Beaufort/route de Reisdorf à Dillingen en présence de Monsieur Claude Meisch, Ministre du Logement et de l’Aménagement du territoire, Monsieur Jean-Luc Nosbusch, Bourgmestre de la Commune de Beaufort, Madame Diane Dupont, Présidente du Conseil d’administration du Fonds du Logement, et Monsieur Jacques Vandivinit, Directeur du Fonds du Logement.
L’ancien corps de ferme, composé de quatre bâtisses, a été entièrement réhabilité pour accueillir six logements de 2 à 5 chambres-à-coucher offrant des surfaces habitables comprises entre 99 et 168 m², un local à vélos et une buanderie commune. En complément, une nouvelle résidence accessible par la rue de Reisdorf a été réalisée. Elle comprend trois logements de 2 à 3 chambres-à-coucher d’une superficie de 73 à 103 m².
Chaque logement bénéficie d’une entrée privative et d’un parking extérieur, garantissant confort et intimité aux habitants.
Conçus dans une démarche de durabilité et de respect du patrimoine, la nouvelle résidence répond aux critères de la classe énergétique A/B/A, tandis que les bâtiments réhabilités de l’ancien corps de ferme répondent aux critères de la classe énergétique C/F/D.
L’ensemble des logements est destiné à la location abordable.
Den Artikel vum de Spuedestéch den 29. November 2022 op dësem Site gëtt et ënnert dem follgende Link: https://beaufort.lu/eischte-spuedestech-zu-deiljen/
