Éischten Europadag zu Beefort

Éischten Europadag zu Beefort

Den 9. Mee virun zwee Joer woren d’Grenzen zou an haut kënne mer eis rëm fräi beweegen. Virun zwee Joer hätt och sollen déi éischt Editioun vum Europadag vun der Beeforter Integratiounskommissioun beim Kiosk zu Beefort sinn. Aus de bekannte Grënn ass d’Fest ausgefall a gëschter wor et endlech souwäit.

Bei herrlechem Summerwieder hu sech ganz vill Leit de Rendezvous zu Beefort ginn a konnten déi verschidde kulinaresch Spezialitéite vun de Beeforter genéissen. Esou huet de “Groupe sportif récréatif et culturel Fiolhoso et Beaufort” Grillspezialitéiten ugebueden, d’Theaterfrënn hu Paella a Sangria op der Plaz preparéiert wärend beim Judo Kniddelen a beim Äishockey Paschtéitche mat Fritten um Menü stoungen. Kaffi a Wafele krut een zum Ofschloss bei den Duerffrënn. De Rullen-Club an de Keleclub stoungen hannert dem Comptoir an hu gesuergt, datt keen duuschtereg Heem gaangen ass.

Nieft dem kulinaresche Programm gouf et och ee musikalesche Programm. Fir d’éischt huet d’Fanfare Schuller-Sprenkéng ee Concert-apéritif ugebueden. Agelaut gouf den Europadag mam  Ofspille vun der Europahymn. Uschléissend  huet d’”Société Municipale des Accordéonistes de Luxembourg” ee Concert gespillt an ofgeschloss gouf den musikalesche Programm vun de “Rusty Boyz”.

D’Amicale Pompjeeën Beefort an de “Centre d’incendie et de secours” vu Beefort huet vun der Geleeënheet profitéiert fir sech ze presentéieren an op de verschidde Stänn konnt een déi eng oder aner gutt Affär maache wärend sech d’Kanner de ganzen Dag am Schied um Sprangschlass ameséiert hunn.

Nom grousse Succès steet enger zweeter Editioun näischt am Wee an et kann ee sech lo schonns den Datum vum nächsten Europadag zu Beefort notéieren: Dënschdeg, den 9. Mee 2023.

Ouverture vun der Kiermes

Ouverture vun der Kiermes

Ënnert dem Regimm vum CovidCheck huet de leschte Freideg déi berodend Kommissioun vun der Integratioun eng symbolesch Ouverture vun der Beeforter Kiermes organiséiert. Um Programm op der Place des Nations stoungen ënner anerem Musék mam Romain Thielen a Claude Juchem a wéi et sech fir eng Kiermes gehéiert och eng gutt Kiermesdrëpp mam Kiermeskuch.

Et wor ee symboleschen Akt an et hofft een, datt an Zukunft rëm méi Fester an Aktivitéite stattfannen déi et erlaben ee richtege Kiermesweekend ofzehalen. Zum Ofschloss nach ee grousse Merci un de Service technique vun der Gemeng, déi d’Plaz no de Bestëmmunge vum CovidCheck ageriicht hunn an esou déi kleng Feier erméiglecht hunn.