Louis Vervaeke mat der Nummer 83 aus der Belsch, Johannes Kulset aus Norwegen a Silvain Dillier aus der Schwäiz sinn déi dräi éischt Cyclisten, déi haut bei der drëtter Etapp vum “Tour du Luxembourg” duerch Beefort gefuer sinn. D’Kinneksetapp hat hiren Depart zu Rouspert an no 201,3 Kilometere war d’Arrivée zu Dikrech.
Um 13.48 Auer an no 61,2 Kilometer sinn de Louis Vervaeke an de Johannes Kulset iwwert d’Linn gefuer, déi de “Grand Prix de la Montagne” zu Beefort markéiert. Si hate ronn véier Minutten a 50 Sekonne Virsprong op de Peloton, dee vum Silvain Dillier ugefouert gouf.
Besonnesch fir d’Schoulkanner war et eng besonnesch Freed net nëmmen d’Veloscourse ze gesinn, mee och déi ganz Karawanne virun an no de Cyclisten. D’Police op de Motorrieder, Offizieller, Invitéeën an den Autoen, Press, Verantwortlech vun den Ekippe mat hire Mechaniker, Ambulancieren, Sécherheetsleit, asw hu méi wéi eng Kéier de Kanner zeréckgewonk an hinne sou eng besonnesch Freed gemeet.
D’Etapp huet de Belsch Mauri Vansevenant gewonn, deen an der nämmlechter Ekipp ewéi de Louis Vervaeke fiert (Soudal Quick-Step) an d’Nummer 82 huet. De Louis Vervaeke koum mat iwwer aacht Minutte Retard op déi 52. Plaz vun dëser Etapp.
E puer Andréck vum Passage zu Beefort:
