Gëschter an haut ass den “Tour de Luxembourg” duerch Beefort gefuer. Souwuel bei der zweeter an der drëtter Etapp stoung Beefort um Programm.
Op der zweeter an 183,9 Kilometer laanger Etapp vu Munneref op Mamer ass et bei Kilometer 77,9 (Vugelsmillen) erop op Beefort gaange fir hannert dem Schlass op Haler weiderzegoen. De Lëtzebuerger Mats Wenzel mat der Startnummer 196 aus dem Team “Leopard Togt Pro Cycling” war am Biergop hannert dem Schlass a virun der Schéiferei am Spëtzegrupp direkt hannert dem Luca von Boven a virum Lennert Teugels. Si alleguer haten eng 25 Sekonne Virsprong op de Peloton. Am Massesprint zu Mamer huet den Dän Jenthe Biermans dës Etapp gewonn.
Wéinst engem schwéieren Accident op der A1 stoungen zwou Ekippen am Stau fest an dowéinst gouf den Départ vun der drëtter Etapp zu Mäertert méi spéit lancéiert. D’drëtt Etapp war gläichzäiteg d’Kinneksetapp mat Arrivée am Haff vum Veiner Schlass. Sou wéi gëschter ass de Mats Wenzel an engem Spëtzegrupp duerch Beefort gefuer. Hien an d’Cycliste Gilles Wilde, Bastien Tronchon, Remy Metz an Olivier Knight haten am Rond-Point eng dräianenghallef Minutte Virsprong op de Peloton. Iwwert d’Eppelduerferstrooss huet den “Tour de Luxembourg” Beefort verlooss an d’Etapp huet de Ben Healy aus Irland gewonn, dee gläichzäiteg Leader am Generalklassement ginn ass.
