Wärend vill Leit vum verlängerte Weekend profitéiert hu fir virun der grousser Vakanz ee klengen Tour oder gréisseren Ausfluch ze maachen, stoung den Terrain nieft der Äispiste ganz am Zeeche vun den Hënn. Den Agility-Veräin “4 Running Paws” huet op säin Summerturnéier invitéiert.
Gegrënnt gouf de Veräin den 20. Februar 2015 zu Bäerdref an no der éischter Editioun vun hirem Summerturnéier zu Bäerdref am Joer 2016 hu si déi folgend Editiounen all Kéiers hei zu Beefort organiséiert. An der Tëschenzäit hu si och hire Sëtz op Beefort verluecht.
D’Hënn aus der Kategorie “Jumping 1” hu Samschdesmoies géint 8.30 Auer de Concoursweekend agelaut am Laf vum Moie stoungen d’Kategorien “Jumping 2”, “Agility 1” an “Agility 2” um Programm. No der Mëttespaus goung et mat “Agility 3” a “Jumping 3” weider. Sonndes war den Oflaf ëmgedréint: “Jumping 3”, “Agility 3”, “Agility 2”, “Agility 1”, “Jumping 2” a “Jumping 3”. D’Präisverdeelung huet jeeweils mëttes an owes stattfonnt.
Déi eenzel Resultater ginn nach nodréiglech matgedeelt.
