Zéng Joer zesumme sangen

D’Choralle Sainte Cécile vu Beefort a “Sang mat” Waldbëlleg/Haler hu gëschter Owend hunn hir Aktivitéiten aus dem leschte Joer der Ëffentlechkeet presentéiert. Bedéngt duerch déi schlecht Wiederkonditiounen hu sech kuerzfristeg eng sëllech Memberen an Invitéeën ofgemellt. Besonnesch erfreet war d’Presidentin Danielle Baden-Lobitz iwwert d’Präsenz vun de Beeforter Gemengerotsmemberen a gläichzäiteg huet si déi Waldbëlleger Gemengerotsmemberen entschëllegt, déi deen Owend eng Sëtzung haten. No enger Gedenkminutt fir d’verstuerwe Memberen huet d’Eliane Donven-Seiwert de gemeinsamen Aktivitéitsbericht virgedroen, dee mat Fotoe vum Louis Boonen begleet war.

Ugefaangen huet d’Joer mat engem Neijoerschpatt a beim Buergbrennen zu Waldbëlleg huet “Sang mat” d’Leit aus der Gemeng mat engem Ständchen a frëschen Äppelbeigneten a Panecher verwinnt. Op Bretzelsonndeg kruten d’Damme vun den Hären eng Bretzel iwwerreecht. Op Ouschterméindeg hu sech d’Memberen am Restaurant “Casa da Sangria” getraff fir e puer gemittlech Stonne mateneen ze verbréngen a bei dëser Geleeënheet kruten d’Männer een Ouschteree vun den Dammen iwwerreecht.

Den 2. Mee hu si zesumme mat deenen anere Chorallen aus de Pare Miersch Saint-François a Mëllerdall Saint-Michel ënnert der Leedung vum Raymond Majerus  d’Oktavmass gesongen. Dat war eng Erausfuerderung an huet hinnen immens vill Freed gemaach. Den 13. Mee stoung den absolutten Highlight um Programm. Déi zwou Choralle haten nach eng Kéier d’Éier fir d’Oktavmass fir d’Paren aus der Regioun Iechternach ze sangen, dat zesumme mat deenen anere Chorallen aus der Regioun. De 25. Mee hu si sech op Aluedung vum Marc Junker, dem Dirigent vun der Iechternacher Chorale, an enger gemeinsamer Prouf zu Iechternach an der Basilika zesummefonnt als Virbereedung op d’Päischtandacht, déi si Päischtméindeg zesumme gesongen hunn.

Déi lescht Prouf virun der Summerpaus war eng aussergewéinlech Prouf. Si war ënnert dem fräiem Himmel beim Dirigent Claude Schmit am Gaart. No der Prouf huet hie si gutt verwinnt mat gudde Mäifel vum Grill an engem gudde Patt. Et war e ganz flotten an onvergiessleche Summerowend, wou vill gelaacht ginn ass an net nëmme gesongen. Direkt am Ufank vun der Summerpaus gouf een Dagesausfluch op Esch-Belval gemeet, wou eng ganz interessant Visite vun den Héichiewen, dem Uni-Site asw. um Programm stoung. Dat Ganzt gouf mat engem flotte Spadséiergang um Escher Gaalgebierg ofgeschloss an natierlech huet et och net u guddem Iessen an Drénke gefeelt.

De 15. August gouf d’Mass fir Léiffrawëschdag zu Waldbëlleg gesonge mat uschléissender Prozessioun duerch d’Duerf. Eng Traditioun déi onbedéngt bäibehal muss ginn.

De 26. November gouf de Cäciliendag gefeiert. Mat enger feierlecher Mass an der Kierch zu Beefort ass et lassgaangen an uschléissend hu si sech am Restaurant vun der Heringer Mille getraff fir den Dag mat engem gudde Maufel a Pättche gemittlech auskléngen ze loossen.

D’Beeforter Chorale huet sech um Beeforter Wantermaart mat engem Gedrénksstand bedeelegt. Et gouf e gudde waarme Grog mat Beeforter Cassis natierlech, eng Kippchen oder fir déi méi “Sérieux” e waarme Schocki vu “Fair Mëllech”. Dëst Joer war et ee grousse Succès. Och dëst Joer huet “Sang mat” Waldbëlleg/Haler, an enger drëtter Sessioun, d’Leit aus der Waldbëlleger Gemeng opgeruff un den Adventsfënsteren deelzehuelen. D’Interessenten haten d’Wiel tëschen enger aktiver oder enger passiver Adventsfënster. Bei enger aktiver Fënster konnten d’Leit net nëmmen déi schéi Fënsterdekoratioun bewonneren awer si sinn och nach op der Plaz mat engem klenge Maufel a Patt verwinnt ginn. Dëst Joer ware  15 aktiv an néng inaktiv Fënsteren dobäi.

Déi zwou Choralle waren ënner anerem bei de Sonndes- a Feierdeegmassen, bei de Gottesdéngschter, de Kommiounen, de Kiermesmassen, den Doudesmassen (14) an aner Geleeënheeten ewéi zum Beispill Hochzäit oder Gedenkfeieren am Asaz. Net ze vergiesse sinn déi sëllech Prouwen vun all Donneschdeg. D’Chorale Sainte Cécile Beefort besteet nach aus fënnef aktive Memberen an d’Chorale “Sang mat” Waldbëlleg/Haler aus 15 aktive Memberen.

Déi dräi Keesen (“Sang mat”, Chorale Beefort an eng gemeinsam Keess), déi vum Louis Boonen an Nicole Thielen-Seiwert verwalt ginn, goufen op Virschlag vun de Revisore Martine De Nutte-Hansen a Marie-Anne Weydert gutt geheescht.

Bei der fräier Aussprooch huet den Diakon Michel Bingen aus der Par Mëllerdall Merci gesot fir den Asaz vun den zwou Choralle wärend d’Monique Kuijpers frou war d’Chorallen aus de verschidde Perspektiven kennenzeléieren an huet ebenfalls Merci gesot fir hir Leeschtungen. Den Dirigent Claude Schmit huet a senge Statistiken erausfonnt, datt déi zwou Chorallen d’lescht Joer 100 mol am Asaz waren an ass och drop agaangen, wat wärend der Versammlung kuerz erwäänt gouf an zwar, datt et reegelméisseg virkënnt, datt um Ducksall méi Leit waren ewéi ënnen an der Kierch. D’Entwécklung an de leschte Jore weist, datt d’Zäit vun den Duerfchéier op een Enn geet an, datt een zesummenhale muss. D’Oktavmass war een Highlight an de leschte Joren an doduercher, datt een zesummen déi nämmlecht Lidder geprouft huet, wier et den Ufank vun engem gemeinsame Repertoire.    

Merci gesot kruten nach déi zwee Organisten, de Jean Schiltz an den Henry Wickens, deen och als Dirigent aspréngt, datt si op der Uergel begleede respektiv dirigéieren. E weidere Merci goung un den Dirigent Claude Schmit, fir säin Engagement a seng wäertvoll Aarbecht, souwéi un den Archivar Aloyse Weyler, deen ëmmer duerfir suergt, datt jiddereen déi richteg Nouteblieder huet.

Éier d’Generalversammlung mat engem gudde Maufel a Patt ofgeschloss gouf, gouf den Ausfluch vum 6. bis den 9. September op Bernkastel, Bonn an d’Ahrtal virgestallt.

Dernière modification le 23.02.2024

Des articles de la même catégorie

Grouss Botz

Grouss Botz

De “Syndicat d’initiative et du tourisme” an Zesummenaarbecht mat der Gemeng Beefort huet och dëst Joer nees eng Grouss Botz organiséiert, zu där all Veräiner an Awunner häerzlech invitéiert ware fir matzemaachen. Déi traditionell Rendezvouse waren zu Beefort bei der...

lire plus
Aller au contenu principal