Bréissel ass nieft Lëtzebuerg a Stroossbuerg déi drëtt Uertschaft, an där d’Europäescht Parlament schafft. De Sëtz vum Europäesche Parlament ass zwar zu Stroossbuerg, allerdéngs halen déi meescht Kommissiounen hir Sëtzungen zu Bréissel of. D’Generalsekretariat befënnt sech zu Lëtzebuerg. Dës Struktur gouf 1992 um Sommet zu Edinburgh gereegelt an am Joer 1999 am Vertrag vun Amsterdam festgeschriwwen. Dës Reegelung huet historesch Hannergrënn, ass awer an der Praxis net ëmmer einfach ëmzesetzen.
Nodeems d’Beeforter Integratiounskommissioun d’lescht Joer am Dezember eng Visitt op Stroossbuerg bei den Europadeputéierte Charles Goerens ënnerholl huet, stoung gëschter Dënschdeg eng Visitt op Bréissel um Programm. Obwuel ee sech schonns moies um 6 Auer op de Wee op Bréissel gemeet huet fir de flotte Programm pénktlech unzefänken huet de Verkéier an der Géigend vun Namur de komplette Plang op d’Kopp geheit. Mat iwwer enger Stonn Verspéidung ass de Grupp zu Bréissel ukomm.
D’Konferenz mam Charles Goerens ass däitlech méi kuerz ausgefall ewéi virgesinn. Dat huet hien awer net dovun ofbruecht fir mat senger laangjäreger Erfarung a Fachkenntnes komplex Themen an e puer Wieder jidderengem verständlech ze erklären. Nieft dem Krich an der Ukrain gouf zum Beispill och de Sujet vun der kënschtlecher Intelligenz ugeschwat. No der Konferenz hunn d’Vertrieder vun der Integratiounskommissioun dem Charles Goerens eng flott Corbeille mat regionale Produiten iwwerreecht. Ofgeschloss gouf den éischten Deel mat der obligater Gruppefoto.
Nom Mëttegiessen goung et rëm zréck an d’Parlament, wou dem Europadeputéierte säin Assistent Yves Hoffmann d’Visiteure vu Beefort duerch d’Gebai gefouert huet. Op den Tribünen huet hien nach weider Informatiounen zu der Funktiounsweis vum Europäesche Parlament ginn. Herno beim Erausgoen hu vill Leit vun der Geleeënheet profitéiert fir eng Foto vu sech virun de Fändelen ze maachen. Virum Bus krut nach jiddereen eng kleng Erënnerung an den europäeschen Dag zu Bréissel gouf ofgeschloss mat enger Visitt vum Park “Mini-Europe” gläich nieft dem Atomium, dem Bréisseler Symbol an och vun der Belsch.
